O‘zbekiston davlat mustaqilligining 34 yillik bayramiga tayyorgarlik ko‘rish va uni o‘tkazish to‘g‘risida prezident qarori e’lon qilindi.
Unga ko‘ra, 2025-yilda Mustaqillik bayrami Yangi O‘zbekistonning taraqqiyot darajasi, jahon maydonidagi obro‘-e’tiboriga har tomonlama munosib tarzda, yuksak saviyada nishonlanadi. Mustaqillikning 34 yilligiga bag‘ishlangan bayram tadbirlari “Vatan uchun, millat uchun, xalq uchun!” degan g‘oyani o‘zida mujassam etgan holda o‘tkaziladi.
Bayram Qoraqalpog‘iston Respublikasi, viloyatlar markazlari va Toshkent shahrida, shuningdek, barcha shahar hamda tumanlar, qishloq va ovullarda munosib nishonlanishi ta’minlanadi. Bayramga tayyorgarlik ko‘rish va uni o‘tkazish bo‘yicha respublika komissiyasi tuziladi. Unga bosh vazir Abdulla Aripov raislik qiladi.
O‘tkaziladigan bayram tadbirlari:
- Qoraqalpog‘iston Respublikasi va viloyatlarda – tegishli mahalliy byudjetlarning qo‘shimcha manbalari hamda jismoniy va yuridik shaxslarning ixtiyoriylik asosidagi homiylik xayriyalari hisobidan;
- Toshkent shahrida – Respublika komissiyasi tomonidan tasdiqlanadigan xarajatlar smetasiga muvofiq respublika byudjeti va Toshkent shahar mahalliy byudjeti mablag‘lari hisobidan teng ulushlarda moliyalashtiriladi.
Madaniyat vazirligi Respublika Ma’naviyat va ma’rifat markazi, Yozuvchilar uyushmasi bilan birgalikda bir hafta muddatda Toshkent shahrida Mustaqillik bayramiga bag‘ishlab o‘tkaziladigan asosiy bayram tadbirining dasturi va ssenariysini ishlab chiqadi hamda uni yuksak g‘oyaviy-badiiy saviyada tayyorlash choralarini ko‘radi.
Mustaqillik bayrami 2024-yilda “Bir bo‘lsak – yagona xalqmiz, birlashsak – Vatanmiz!” shiori ostida, 2023-yilda “Yangi hayot uchun, Yangi O‘zbekiston uchun!” shiori ostida o‘tkazilgandi.
!