17:16 / 26.07.20257.56k
Ma’lumki, ingliz, fransuz, nemis, ispan, italyan, arab, xitoy, yapon, koreys, turk, fors, pushtu, dari, urdu, hind tillari hisoblanadi. Ya’ni, aynan mana shu tillardan dars beradigan pedagoglar xorijiy tillar o‘qituvchilari hisoblanadi.
Vazirlar Mahkamasining 2021-yil 19-maydagi 312-sonli qarorining 9-bandida 2025/2026-o‘quv yiliga qadar umumiy o‘rta, o‘rta maxsus va professional ta’lim muassasalarida faoliyat yuritayotgan barcha xorijiy tillar o‘qituvchilari kamida B2 darajadagi milliy yoki unga tenglashtirilgan mos darajadagi xalqaro sertifikatga ega bo‘lishi lozimligi belgilangan.
Shuningdek, Maktabgacha va maktab ta’limi vazirligi xorijiy til o‘qituvchilariga 2025/2026-o‘quv yiliga qadar B2 darajadagi sertifikatlarga ega bo‘lish lozimligi haqida qat’iy ogohlantirish bergan.
Aslida, ushbu tartib avvalroq joriy etilgan bo‘lib, Maktabgacha va maktab ta’limi vazirligi aralashuvi bilan B2 darajadagi milliy yoki unga tenglashtirilgan mos darajadagi xalqaro sertifikatga ega bo‘lish talabi ortga surilgandi.
Bu safar vazirlikning qarori qat’iymi?
Maktabgacha va maktab ta’limi vazirligining Daryo.uz nashriga ma’lum qilishicha, hozirgi kunda raqamlar tahlil qilinib, o‘rganib chiqilyapti. Iyul–avgust oylarida ko‘p o‘qituvchilar til sertifikati olish uchun arizalar topshirgan, javoblar sentyabrga yaqin chiqadi.
Yangi o‘quv yilidan boshlab kamida B2 sertifikati bo‘lmagan chet tili o‘qituvchisi bilan mehnat shartnomasi bekor qilinishi mumkin. Sertifikat talabi qo‘yilishi sifatli ta’limga erishish ekani bir necha bor aytilgan. Xorijiy tilda dars beruvchi o‘qituvchi chet tilini eng kamida B2, ya’ni oliy ta’limni bitirganda bakalavrga qo‘yilgan darajada bilishi kerakligi nazarda tutilmoqda.
Xorijiy til o‘qituvchilariga ogohlantirish berish boshlandi
Xalqtaliminfo.uz manbasining xabar berishicha, barcha hududiy maktabgacha va maktab ta’limi boshqarmalariga vazirlik tomonidan tegishli sertifikatga ega bo‘lmagan xorijiy til o‘qituvchilarini yana bir bor ogohlantirish bo‘yicha og‘zaki ko‘rsatma berilgan.
Shundan so‘ng, barcha hududiy boshqarmalar tomonidan umumiy o‘rta ta’lim maktabi direktorlariga ham rasmiy ko‘rsatmalar berilib, maktablarda faoliyat yuritayotgan xorijiy til o‘qituvchilari to‘g‘risida tahliliy ma’lumotlarni taqdim etish so‘ralgan.
Shuningdek, ko‘plab ta’lim muassasalari direktorlari tomonidan xorijiy til o‘qituvchilariga rasmiy ogohlantirish xatlari ham berilmoqda.
